Ane sekarang2 ini lagi rada2 sedih, ngeliat perkampungan betawi yang makin lama makin ilang kegusur. Kebetulan ane tinggal di daerah condet, depan ane persis sekarang lagi dibangun sekolah global internasional. Tadinya sebelum dibangun global, daerah itu adalah lapangan dan biasanya ane maen layangan disitu. Ane jadi inget masa kecil dulu di pondok aren. Walaupun ortu ane asli jawa tapi ane lahir gede di betawi, jadi ane udah merasa jadi orang betawi. Maka dari itu ketika sekarang di condet yang katanye cagar budaya betawi udah makin banyak pembangunan yang tidak berpihak pada masyarakat betawi, ane jadi sedih.
Dulu pas ane kecil di pondok aren, ane masih bisa mandi di kali angke nyang bening, nyerampangin mangga kuweni kong aji, ngebebek buni, nyengget kecapi , namnam ame jamblang. Trus kalo lagi iseng, pulang sekolah langsung nanggok ikan mujaer ama betok di sawah depan rumah, sambil bikin burung2an dari tanah lempung. Paling demen kalo lagi musim ujan, ikan emas orang pada lepas kesawah, rame2 pada bawa tanggok dah.
Hal yang sama mungkin udeh kagak bisa didapetin ame anak2 jaman sekarang. Selain emang lahannya udeh makin sempit, anak2 sekarang juga lebih seneng maen PS kali. Udah kagak tau lagi yang namanya pohon kecapi, mangga kuweni, jamblang, dlsb. Sayang beribu sayang, padahal pohon2 itu sekarang sudah sangat langka dan merupakan kekayaan masyarakat betawi kudu bin wajib di lestari'in.
Bagi ane budaya betawi itu sangat istimewa. Masyarakat betawi adalah masyarakat agamis yang khas dengan lelucon2 segarnya. Ciri2nya masyarakatnya seperti jujur, jenaka, seneng ke masjid menjadi hal yang sangat menarik. Belon lagi sama budaye ondel2nye. Kebetulan sodara2 ane, ada yang nikah ame orang betawi. Prosesi pernikahan yang paling menarik adalah pas acara palang pintu, hehehe ... jadi inget Bang Pitung dari Marunda.
Kalo udah gini ane jadi kepikiran, suatu saat kalo Allah SWT ngasih rejeki lebih, ane pingin punya tanah luas trus bikin rumah betawi, didepannye ada bale-bale ame mushola, trus disekelilingnye ade pohon kecapi lumut, Mangga kuweni kayak punya kong aji, rukem, jamblang, namnam, buni, dan jambu mede, biar anak cucu kite, anak2 muda betawi pada tau pohon2an yang sekarang udeh pada langka ... Kapan yee bisa gitu ...
Wassalam
Pencinta budaya Betawi
Tidak ada komentar:
Posting Komentar